ಈ ಜಗತ್ತಿನಲ್ಲಿ ಇರೋದು ಎರಡು ಮಾತ್ರ.......ಧನ (+) ಇನ್ನೊಂದು, ಋಣ (-)

ನಾವು ಈ ಧನಾತ್ಮಕ ಮತ್ತು ಋಣಾತ್ಮಕತೆಯ ಬಗ್ಗೆ ವಿಚಾರ ಮಾಡುತ್ತಾ ಹೋದರೆ, ಬಹಳಷ್ಟು ವಿಚಾರಗಳು ಅನಾವರಣವಾಗುತ್ತಾ ಹೋಗುತ್ತದೆ. ಇವೆರಡೂ ಶಕ್ತಿಯ ಒಂದೊಂದು ರೂಪ. ವೈಜ್ನಾನಿಕವಾಗಿ ಹೇಳಬೇಕೆಂದರೆ ಒಂದಿಲ್ಲದೇ ಇನ್ನೊಂದಿಲ್ಲ.

ಈ ಎರಡೂ ಶಕ್ತಿಗಳನ್ನು ನಾವು ಯಾವ ರೂಪದಲ್ಲಿ ಬೇಕಾದರೂ ಗುರುತಿಸಬಹುದು ಅಲ್ಲವೇ? ಈ ಬ್ರಹ್ಮಾಂಡದ ಹುಟ್ಟಿನಿಂದ ಹಿಡಿದು, ಜಗತ್ತಿನಲ್ಲಿ ನಡೆಯುವ ಎಲ್ಲಾ ಸ್ಥಿತ್ಯಂತರಗಳಿಗೆ ಮೂಲ ಕಾರಣ ಈ ಎರಡೂ ಗುಣಗಳು. ಕೊನೆಯಲ್ಲಿ ನಮ್ಮ ಕಲ್ಪನೆಯ ಪ್ರಕಾರ ಇದರ ಅಂತ್ಯವೂ ಈ ಮೂಲಕವೇ ಅಲ್ಲವೇ?

ಇದರ ಜೊತೆಗೆ ಇರುವಂಥದು ಚಲನಶೀಲತೆ, ಈ ಜಗತ್ತಿನಲ್ಲಿ ಯಾವುದೂ ನಿಂತಿಲ್ಲ......ಇಲ್ಲಿ ನಿರಂತರತೆ ಇದೆ. ನಮ್ಮ ಕಣ್ಣಿಗೆ ನಿಂತಂತೆ ಕಾಣುವ ಜಡವಸ್ತುವಿನಲ್ಲೂ ಇರುವ ಪರಮಾಣುವಿನಲ್ಲಿ ಚಲನಶೀಲತೆ ಇದೆ. ಅದರಲ್ಲೂ ಧನ ಮತ್ತು ಋಣಗಳಿವೆ. ಹಾಗಾಗಿ ಈ ಧನಾತ್ಮಕ ಮತ್ತು ಋಣಾತ್ಮಕತೆಯಲ್ಲಿ ಇರುವ ಚಲನಶೀಲತೆಯ ಕಾರಣದಿಂದ, ನಮ್ಮ ಸ್ವಭಾವಜನ್ಯವಾದ ಧನ ಮತ್ತು ಋಣಾತ್ಮಕತೆಯಲ್ಲಿ ಬದಲಾವಣೆಯನ್ನು ಕಾಣುತ್ತಾ ಇರುತ್ತೇವೆ.